Вэбээр тэнэсээр сүүлдээ уйдаж байна уу? Таны сонирхдог сэдвээр уншууртай вэб хуудас олдохгүй эсвэл та бүгдийг нь олоод үзчихсэн гэж бодно уу? Тэгж бодож байвал холоо эндүүрч дээ та, уучлаарай…

StumbleUpon бол web2.0-н бас нэгэн гайхамшиг, бас нэгэн гайхалтай вэб үйлчилгээ ажгуу. Энэ community-н гол сүнс нь StumbleUpon-ы өөрийнх нь гишүүд, тэдний уйгагүй оролцоо юм. Тиймээ, тэдний “олсон” саитуудаас энэ community бүрддэг юм.

Та, жишээ нь, “hacking” гэсэн сэдвээр элдэв зүйлс интернэтд хайж байлаа гэж бодъё л доо. Тэгвэл StumbleUpon-г хэрэглэснээр бусад хэрэглэгчдийн нээж илрүүлсэн гоё гоё саитуудыг үзэх боломжтой болно гэсэн үг. Зөвхөн нэг товч дараад л таны сонгосон сэдвээрх ямар нэгэн саит руу “бүдрээд” орчихно гэсэн үг.

Та үзсэн саитдаа “таалагдаж байна” эсвэл “гойд биш” гэсэн саналыг өгснөөр цаашид тэр саитын StumbleUpon-д “тааралдах” боломжийг ихэсгэж/багасгаж байгаа хэрэг юм. Энэ бол цэвэр хэрэглэгчдийн үнэлгээн дээр тогтох гайхалтай тогтолцоо гэж би хувьдаа шагшаад байгаа юм.

Мөн өөрийн “нээсэн” саитаа бүртгэж болно. Ингэснээр дараа дараагийн “тааралдах” гишүүд санал өгөх боломжтой болно гэсэн үг.

Та маш олон сэдвээс сонгож “санамсаргүй уулзалт” хийж болно. Сэдвийн хүрээний хувьд ёстой л “ногоон хурганы арьс, нохойн битүү туурай”-наас бусад нь бий. Би л гэхэд “hacking” сэдвээрх хамаг саитыг нь үзээд дуусгасан (гэхдээ олсон мэдээллээ боловсруулсан эсэх нь эргэлзээтэй :P ).

Энд үзэх юм их бий шүү хүмүүс ээ, яг одоо хажуугийн зурган дээр эсвэл энд дараад таны вэб браузерт нэмж суух toolbar-г татаад аваарай. Мэдээж хэрэглэж үзсэнийхээ дараа ямар ихээр таалагдсанаа хэлбэл болох нь тэр.